Biography
Policies
Institutions
The Assassination
Youmna Bachir Gemayel Speech Print E-mail
خلال الاحتفال الذي أقيم في ساحة ساسين للاحتفال بالذكرى الثالثة لإنسحاب الجيش السوري من لبنان في العم 2005، ألقت الشيخة يمنى بشير الجميّل باسم منطقة الاشرفية الكتائبية الكلمة التالية:

كي لا ننسى،
هيدا هوي شعار تجمعنا اليوم،
مَعْ العِلِمْ،  إنو لا الكتائب ولا القوات ولا حتى ابناء المنطقة بحاجة لِتَجَمُّع بالاشرفية، تا يِرْفَعوا شعار" كي لا ننسى".
يا ريتْ قادرين ننسى!
بالعكسْ، منتذَكرْ كلْ يوم الوَجَعْ والجراح يللي تركْها المحتل بكل منطقة، وبقلوبنا وبقلوبْ امهاتْنا وأطفالنا، بالمعاقين وبالمخطوفين والمسجونين السياسيين يللي مش رح نِنساهم أبداً لأننْ بيمثلوا ضميرْنا، ورحْ نضلْ نطالبْ ونناضلْ حتى يِرْجَعوا عالوطن.

تلاتين سنة احتلال وقهر،
تلاتين سنة محاولاتْ تركيع شعب بكاملو،
تلاتين سنة إضطهاد وحْبُوسي واعتقالات واغتيالات
تلاتين سنة تهجيرْ وتهديمْ بيوت وتَعْتير....

ولكن مقاومتنا، يللي بلّشِت مقاومة مسيحيّة وتحوّلت مقاومة لبنانية، قدرِتْ بعد 10452  يوم إحتلال تِجْبرُن على الانسحاب من الـ10452 كلم2، تا تِرجعْ السيادة ويبلّش مشوارْ الحرية يللي بعدو طويل، لأنو للأسف بعد في ناس ما تعلّموا، وبدُن يرَجّْعوا الهيمنة السورية على لبنان.

كأننْ نسيوا قديشْ شعبُن دَفَعْ دمْ وقهرْ وعزابْ وإزلالْ.
حلّلُنْ يُوعُوا بقا.

إذا السوري نِسي شو عِمِلْ ببيوت الاشرفية سنة 78، وشو عِمِلْ بزحلة سنة 81، وشو عِمِلْ بـقناتْ والشمال، وإذا هوِ نِسي مين قَتَلْ بلبنان ومين اعتَقَلْ، إذا هوِّ نِسي، التاريخ مِش رَحْ ينسى.

- قبل ما ننسى، وقبل ما نسامِحْ، خلّيهُم يْرَسّموا الحدود وخليّهم يِعْتِرفوا إنو لبنان دولة.

- قبل ما ننسى، وقبل ما نسامِحْ، خلّيهُم ينسوا هِنّي إنو لبنان ريفْ الشام، وخلّيهُم يتعاملوا معو متل ما لازم.

- قبل ما ننسى، وقبل ما نسامِحْ، خلّيهُمْ يقْبلوا بتمثيل ديبلوماسي مع لبنان، مع إنّي بِعتِبرْ، إنو حتى لو كانْ في تمثيل ديبلوماسي بين لبنان وسوريا، لازم نكون عَم نطالِبْ اليوم بقَطعْ العلاقاتْ الديبلوماسية بيننا وبينُنْ، لأنو سوريا ما بتستاهِلْ، بعدْ كلْ يللي عملِتو، إنّو يكون إلها تمثيل ديبلوماسي مع لبنان.
من الاشرفية، من هالساحة يللي انطلقِتْ منها  المقاومة اللبنانية مع بشير، بدعيكُم، لأي حزب أو تيار انتميتوا، إنو نوحّدْ قلوبنا وصفوفنا، ونضلّ رَزْمة وحدة، لأنو وجودنا بعدو مهدّد، لأنو حرّيتنا بعدا مهدّدِة، ولأنو لبنان الدولِة بعدو مهدّدْ.

من الاشرفية، بوجِّه رسالة من خلالكُم، كتائب وقوات، يللي نِضالُن واحد وهدَفُنْ واحد ومبادؤن الوطنيّة وحدة، وهنّي قدمّوا الشُهدا، ومن واجباتُن إنّو يحافظو عالوِحدِه بيناتُن لأنو أعداء لبنان بعدُن عالبواب،

بوجّه رسالة من خلالكم لكل أهلنا ببيروت، ولجمهور ثورة الأرز بكل لبنان، تا أكدّلُن أنو هالثورة ما إنتهت بعد، طالما في نظام بَعْدو طامِع بأرضْنا وشعبنا ومؤسساتنا وسيادتنا. وبتوجّه كمان لرفاقنا بزحله وبقلُنْ : كلنا معكُم، ودمْ نصري وسليم يللي غطى أرض زحلة من كَمْ يوم هوّ مسؤوليتنا، وأمانِة بقلوبِنا وما راح نخّلي دَمهم يروح ضيعان. 

وليللي إيمانُن بلبنان ضعيف بقلهم : ما تخافوا وما تيأَََسوا. لبنان باقي سيد حرّ ومستقل، شو ما طال الوقت ومهما غِليِتْ التضحيات.
 
عشتم وعاش لبنان
يمنى بشير الجميّل


 

 
< Prev   Next >
 

Bachir Gemayel Foundation 09 all rights reserved.